الخميس، 1 أبريل، 2010

1000مبروك

نوع من المحاسبه بشكل مختلف..بتكرار نفس التفاصيل تكتشف ما يختفي بينها من ثغرات..وتكون الامور اكثر وضوحا..
كنت أعتقد أني وحدي من تتحقق أحلامي السيئه..لكني اكتشفت أنها أسطوره يتناقلها الجميع منذ زمن..مما دفعني للشك في وجودي في الحاضر..هل عشت نفس الحياه قبل ذلك؟

الإنسان لا يري أخطاؤه..الان أتساءل عما يراه الجميع ولا أراه أنا علي الرغم أنه جزء من تكويني..أبحث عن يميني ويساري..أركض بغضب في أنحاء المنزل حتي أكتشف الخطأ الذي يظهر في وقت لاحق لكن بالرفق..

التكرار لنفس الأحداث يدفعني للملل..لكن ذلك لم يحدث خاصه إذا كان هناك جلد للذات يقدم المزيد من الافكار التي أحاول بها تغيير الواقع..حتي الأفكار متشابهه..لا يخرج من بينها سوي فروع تنمو سريعا وتتشابك في سماء العقل..تتعقد الامور أكثر

عندما تتحرك كل الاشياء وتدرك أنك مقيد داخليا بما تعرفه من مصير..تركض في ثبات..تبكي بدون ألم..تتألم بدون اهات..وتسقط دموعك كما الأمطار الصيفيه التي تأتي في غير موعدها...تغمض عينيك أملا في النوم ف تري ما ترفضه ..يختلط عليك الأمر..أيهما حقيقه؟؟تتساءل رغم معرفتك بها مسبقاً

إذا كانت النهايه حتميه ف من حقي أن أختار طريقه موتي..لكن هذا الحق أيضا مسلوب..كيف تطالب بحق في الموت وقد أهملت حقك في الحياه؟؟هكذا أتساءل..أترك لنفسي الاجابات ..تفاجئني بالنتيجه تظهر فجأه..مبروك..(أنت أناني ..)..!!
تتوقف مع هذه الحروف عقارب الساعه..حيث تكون بمثابه مؤشر لبدايه "مختلفه" من جديد..

من وحي فيلم..ألف مبروك

الاثنين، 22 مارس، 2010

النكد

المصائب لا تأتي فرادي..
يمكن اختصار كل ما يحدث في أوقات الشده بهذه الجمله..(انا مالي قلبت لغه عربيه كده ليه؟؟..ربنا يستر) في البدايه..خبر صغير..لكنه قوي المفعول..يبدأ الغضب اولا بشراره صغيره..تأتي بعدها شعله اكبر من يظهر تأثيرها علي ارتفاع الحاجب الشمال اولا..ثم يليه الحاجب اليمين..ثم الحاجبان معا..حتي يكاد من يراهما يقسم انهما سيقفزان من وجهك..في مرحله الثوره والاحمرار في الوجه..تستمع لأغاني مثل(اسكت بقي-اصاله,عمرودياب-كلهم بيقولوا كده ف الاول..أكمل ,مشيت ف سكه) ..

يليها مرحله الهدوء الموقت..مجرد خداع وقتي تشعر فيه أنك تجاهلت كل ما يؤرقك ..سريعا ما تتحول راحتك لحزن بعد ان تفكر وتحلل بهدوء في لحظات..تبدأ في سماع(ضميرك صحي-أصاله..ساعدني-أصاله,نص حاله لأصاله...اي نكد لأصاله..واحتمال تجيب اصاله نفسها قدامك ف فيديو عشان تشوف مدي تأثرها ف الاغنيه ف تنكد عليك اكتر..وطبعا عمرو دياب وقاللي الودااااااااااع وانا اقوله ايه..وبعدين حبيبي يا عمري انا كلي جراح..و وفي الاخر..حكاياتي اللي انا عشتها ....واهو بكره نقول كانت ذكري وعشنالنا يومين..وبعدها مباشر فضل شاكر حظك يا قلبي.,.ولو ليك ف النكد اكتر ممكن تسمع انا وليلي لكاظم  ومدينه الحب لكاظم واي حاجه لكاظم(ممكن تعمل كاظم واصاله ميكس جامد..نكد أصلي )..

في تلك الحاله المغلقه..لا تري إلا ومضات متتاليه..قد تعتقد نفسك المشبعه بالحزن أنها بريق أمل..لكنك تتأكد سريعا أنها لسعات من الضوء التي تستفز فيك المتبقي من أعصابك..تري الكون كله حتي بظواهره غير المرئيه ..الجميع قد تفرغ تماما لمحاصرتك بكل أساليب الضجر ..تردد في صمت(اااااااه دانتوا جاينلي انا بقي..)..
مجازفه مجنونه تلك التي تدفعك لتحدي كل هؤلاء..تقاوم أحدهم..تصرخ في وجه الاخر..تكتم ما بداخلك مره..وتعلنه مره أخري بقوه..تصبح محارب علي جواد في صحراء ذات شمس عموديه..والجميع يشهر سيوفه ضدك ..تدافع وتقاتل دفاعا عن أعصابك حتي النهايه..يبدو أن قواك إنهارت سريعاً..تسقط أسيرا في قيود الحزن..حيث يراك الجميع مسجون في ذاتك..لا يعلمون أن المفتاح لديهم..

الاثنين، 15 مارس، 2010

انك تحرق دم حد

المقادير(وتحيه كبيره لحليم ..وانا كل ما اقول التوبه يابويا ترميني المقادير ياعين)
-كلام بايخ
-وقت مناسب (وياريت تختار الوقت بعنايه شديده لانه عامل مهم..ممكن يكون معاك او ضدك)
-شخص حساس(احم احم)


الطريقه:
تجيب صفحه الفيس بوك الخاصه بالشخص ده..تروح عامل رساله جديده وحاطط فيها كلام بايخ وملوش لازمه..وتروح عامل 
send
للشخص..ويا سلام بقي لو كان الصبح وهو لسه بيبدأ يومه..


ده بالظبط اللي حصل معايا امبارح..شخص سخيف بعتلي رساله اسخف..الساعه كانت 9 الصبح وكان لسه في وقت قبل ما اروح الكليه
قولت ادخل بسرعه ع الفيس بوك واشوف ايه الجديد..
وللأسف قريتها..وياريتني ما قريتها..
قمت لبست وانا متعصبه..وطبعا مفيش ولا حاجه من هدومي عاجباني..وعماله اجيب الاوضه يمين وشمال ورايحه جايه ف البيت من غير سبب..لحد ما لست وخرجت..طول مانا ف الميكروباص عماله اطقطق صوابعي  وحاسه ان الست اللي قاعده جنبي كانت خلاص هتقوم من كتر التوتر اللي كنت عاملاه..
طلعت الموبايل ..كلمت واحده صاحبتي..مردتش..وكمان مبترديش ..؟؟!!طيب اما اشوف وشك بس
ركبت المترو..قاعده عماله ابص للناس وانا متعصبه..هم تقريبا قالوا عليا مجنونه..مش مهم..انا دلوقتي متعصبه..واي حد يقف قدامي يا ويله يا سواد ليله..
مره قبل كده رامي زميلي قال(بسمه دي لما تتعصب اجري من قدامها بالذوق..هتلاقي واحده بتجري والناس كلها وراها )
هههههههههههههههه والله فكرتني يا رامي بأيام العصبيه اللي بجد بقي

مع اني اتعلمت ابقي هاديه وبارده مع ناس كتير ..بس ده كان فعلا مستفز ..
المهم شويه وجاتلي رساله ع الموبايل ..يا خرابي ..مضمونها لوحده اصلا يموت ..ايه الناس دي متفقين عليا ولا ايه ..
وصلت الكليه..مستعجله جدا ..والساعه 12 و5 والمفروض المحاضره الساعه 12..كلمت رنا صاحبتي عشان اسألها الدكتوره بتدخل ولا ايه والمحاضره فين اصلا؟راحت قالتلي الدكتوره لسه مجتش..قولت الحمدلله اليوم هيتعدل..لسه باخد نفسي..الاقي بت رخمه كده معايا ف الدفعه بس معرفهاش اوي يعني ..وحبكت بقي تسلم عليا وعماله تسأل علي حاجات مليش علاقه بيها..قمت استأذنت وقولت لها معلش انا طالعه المحاضره..لقيتها بتقولي انا جايه معاكي..ولك ان تتخيل احساس ان في لازقه  بقي وف قوت زي ده..قولت لها طب ياللا بسرعه عشان نلحق..لقيتها بتقولي طب هجيب كارت واجي ..قولت لها مع نفسك ..
طلعت المحاضره..قابلت حد رخم ع السلم..هو الناس دي ف طريقي لييييييييييه؟؟وحبكت دلوقتي ..رحت طلعت جري ع المدرج ونفضت للناس كلها ..
طلعت المحاضره..فتح الباب لقيت الدكتور دخلت..خبطت شويه بقولها بعد اذنك يا دكتور..مردتش وكانت بتتكلم ف الموبايل..وكمان مبترديش عليا؟؟رحت دخلت وقفلت الباب ورايا رخامه بقي ..


لقيت اصحابي قاعدين ورا ف اخر بنج..وده طبيعي يعني ده مكاننا المفضل..لكن ازاي بقي وانا لسه هروح لكم للاخر كده؟يووووووه بقي..وانا داخله ليهم كذا حد بيشاور وهاي وصباح الخير وحركات..وكمان بتقول صباح الخير ..؟؟اخرررررررس
وصلت لاصحابي ..حطيت شنطتي ع البنج..واضح انه كان باين علي وشي اوي..قعدت.. لقيت جيسي نطت جت علي يميني واسماء علي شمالي..والاتنين بيبصولي ويسألوا..مقدرتش بقي ..لقيت عينيا دمعت وخلاص علي اخري ..قولتلهم حصل كذا كذا كذا..قالولي طب وانتي بتضايقي نفسك عشان حد ميستاهلش ليه؟؟
لما ركزت كده شويه مع نفسي لقيت انه فعلا حد ميستاهلش..هي مجرد حساسيه من الكلام البايخ..فكرت قد ايه وقت واعصاب ضاعوا ,قد ايه كان ممكن حد يكلمني واتعصب عليه ونخسر بعض ف  لحظه زي دي..قد ايه حاجات كتير ممكن تروح بسبب العصبيه...

ملحوظه:البوست خدعه..اني مش بقولك تعمل كده عشان تحرق دم حد..لا دي عشان اللي دمهم بيتحرق زيي يعرفوا ان ده علي ناس متستاهلش..:)..لأن اللي يستاهل مش هيحرق دمك


الثلاثاء، 9 مارس، 2010

صناعه المدونه دي!

 


اول بوست علي البلوجايه دي..هيكون تكنيك ولادتها..
ولانها مش اي مدونه..ولأن مش اي حد عاملها(وده مش غرور وهتعرفوا السبب كمان شويه)..لأن مفيش حد عاقل يصحي من النوم ف نص الليل فجأه عشان يعمل مدونه..ومفيش حد عاقل يصحي ويصمم انه يقوم حتي لو كان عنده معاد الصبح بدري..ومفيش حد عاقل اصلا تطق ف دماغه فكره ف يقوم يعملها..وهو بيعملها يكتشف انها كانت تايهه عنه من زمان ويقول ياااااااااه اخيرا لقيتها (مهي طول عمرها تايهه اساسا بس ده لزوم الافوره)..ولأن مفيش حد عاقل بيقعد يشغل نفسه بكل حاجه بتحصل حواليه..ومفيش حد عاقل بيفكر ف تفاصيل حياته ..ومفيش حد عاقل عايز يعرف هي ليه بقت كده ودايما بيسأل عن الاسباب..حتي لو قام  من نومه  وضحي براحه باله(ثانيه واحده في شويه دموع هنا) عشان يكتشف حاجه جديده..


لان مفيش حد عاقل خد باله اني لحد دلوقتي مقولتش  حاجه عن المدونه..بس اديت الخطوط الرئيسيه..ولان مفيش حد عاقل فهم حاجه من كلامي لان في سلك عندي ضارب شويه..ف انا مضطره اقولكم اني كنت قعدت تقلت نمت فتحت صحيت فكرت شغلت الجهاز فتحت الفاير فوكس..عملت المدونه

امضاء..مفيش حد عاقل